مسئولان ریاست معارف ولایت لوگر اعلام کردند که طی سال آینده حدود ۲۰ مکتب جدید در این ولایت ساخته می‌شود.

به‌گزارش خبرگزاری رویداد روز، «شاپور عرب»، سخنگوی ریاست معارف لوگر می‌گوید که براساس پلان وزارت معارف، در سال 1399 خورشیدی، 26 مکتب در شهر «پل‌علم» و ولسوالی‌های «محمدآغه»، «بره‌کی‌برک»، «چرخ»، «خوشی»، «خروار» و «ازره» به فعالیت آغاز خواهد کرد.

به گفتۀ او، این مکتب‌ها در بخش‌هایی به فعالیت آغاز می‌کنند که پیش از این هیچ مکتبی در آنجا وجود نداشته و وزارت معارف برای این مکتب‌ها، ساختمان‌های معیاری می‌سازد.

به‌کانال تلگرام خبرگزاری رویداد روز بپیوندید!

با آغاز فعالیت این مکتب‌ها برای 700 دختر و 1800 پسر زمینۀ آموزش‌وپرورش فراهم می‌شود.

مسئولان ریاست معارف لوگر می‌گویند، این مکتب‌ها به در خواست عالمان دین، بزرگان قوم و خانواده‌های دانش‌آموزان در لوگر، ساخته می‌شوند.

در حال حاضر 140 هزار دانش‌آموز در بیش از 300 مکتب در لوگر سرگرم آموزش‌اند که از این میان 40 هزار تن آنان دختران هستند.